ఇంటింటికీ సైకిల్‌పై చంద్రబాబు.. 45 రోజుల భారీ ప్రచారానికి శ్రీకారం!

ప్రత్యేక ఓటర్ల జాబితా సవరణ (Special Intensive Revision - SIR) ప్రక్రియను అత్యంత ప్రాధాన్యతతో తీసుకోవాలని ముఖ్యమంత్రి, టీడీపీ అధినేత నారా చంద్రబాబు నాయుడు పార్టీ శ్రేణులకు పిలుపునిచ్చారు. అమరావతిలోని టీడీపీ కేంద్ర కార్యాలయంలో ఎమ్మెల్యేలు, ఎంపీలు, ఎమ్మెల్సీలు, నియోజకవర్గ ఇన్‌ఛార్జులు, పరిశీలకులు, బూత్ లెవల్ ఏజెంట్లు (బీఎల్ఏలు) పాల్గొన్న ప్రత్యేక వర్క్‌షాప్‌లో ఆయన దిశానిర్దేశం చేశారు. ఓటర్ల జాబితా ఎన్నికల్లో విజయానికి కీలకమని, అందువల్ల ఎలాంటి నిర్లక్ష్యానికి తావులేకుండా ప్రతి ఒక్కరూ బాధ్యతగా వ్యవహరించాలని సూచించారు.

మహానాడును పార్టీ విజయవంతంగా నిర్వహించిందని, రెండు రోజుల కార్యక్రమానికి దాదాపు 24.50 లక్షల మంది వర్చువల్‌గా హాజరయ్యారని చంద్రబాబు పేర్కొన్నారు. ప్రస్తుతం ఓటర్ల నమోదు ప్రక్రియ కొనసాగుతోందని, దాదాపు ప్రతి 20 నుంచి 25 ఏళ్లకోసారి జరిగే ప్రత్యేక సవరణలో భాగంగా 2002 ఓటర్ల జాబితాను ప్రామాణికంగా తీసుకుని ఈ ప్రక్రియ చేపడుతున్నారని వివరించారు. జూలై 14లోగా రెండుసార్లు ఓట్ల మ్యాపింగ్ జరుగుతుందని, ఆలోపు అర్హులైన ప్రతి ఓటరు పేరు జాబితాలో నమోదు అయ్యేలా పార్టీ శ్రేణులు కృషి చేయాలని కోరారు.

అన్నీ ఓటర్ల జాబితా ఆధారంగానే..

ఓటు నమోదు చేయించుకోవడం ఓటర్ల బాధ్యత అయితే, ఆ ప్రక్రియపై ప్రజల్లో అవగాహన కల్పించడం రాజకీయ పార్టీగా తమ బాధ్యత అని చంద్రబాబు స్పష్టం చేశారు. ఎన్నికల్లో వ్యూహాలు, ప్రణాళికలు అన్నీ ఓటర్ల జాబితా ఆధారంగానే రూపొందుతాయని పేర్కొన్నారు. రాష్ట్రంలోని వివిధ ప్రాంతాల నుంచి వచ్చిన ఓటర్లు పెద్ద సంఖ్యలో ఓటు హక్కు వినియోగించుకోవడం వల్లే కూటమికి 164 స్థానాల ఘన విజయం సాధ్యమైందని గుర్తుచేశారు.

కూటమి భాగస్వామ్య పార్టీలైన జనసేన, బీజేపీలతో కేవలం ఎన్నికల సమయంలోనే కాకుండా అన్ని సందర్భాల్లోనూ సమన్వయం కొనసాగించాలని చంద్రబాబు సూచించారు. ఎస్‌ఐఆర్ ప్రక్రియ కూటమి పార్టీల మధ్య సమన్వయానికి తొలి పరీక్షగా నిలుస్తుందని వ్యాఖ్యానించారు. ఈ ప్రక్రియ కోసం మూడు పార్టీల ప్రతినిధులతో ప్రత్యేక కో-ఆర్డినేషన్ కమిటీ ఏర్పాటు చేస్తామని ప్రకటించారు. పార్టీ బలోపేతానికి సమర్థవంతమైన నాయకత్వం అవసరమని, తనకు అనుచరుల కంటే నాయకులే ముఖ్యమని చంద్రబాబు అన్నారు. 2024 ఎన్నికలకు ముందు జరిగిన పట్టభద్రుల ఎమ్మెల్సీ ఎన్నికల్లో క్షేత్రస్థాయి, సాంకేతిక స్థాయిలో సమర్థవంతంగా పని చేయడం వల్లే విజయం సాధించగలిగామని గుర్తు చేశారు. ఒకప్పుడు పోటీ చేయడానికి వెనుకంజ వేసిన ఎన్నికల్లో కూడా పార్టీ నెట్‌వర్క్ బలంతో గెలుపొందినట్లు చెప్పారు.

ఇంటింటి ప్రచార కార్యక్రమం..

జూలై 15 నుంచి ఆగస్టు నెలాఖరు వరకు రాష్ట్రవ్యాప్తంగా ఇంటింటి ప్రచార కార్యక్రమం చేపట్టాలని చంద్రబాబు ఆదేశించారు. గత రెండేళ్లలో ప్రభుత్వం అమలు చేసిన సంక్షేమ, అభివృద్ధి కార్యక్రమాలను ప్రజలకు వివరించాలని సూచించారు. 45 రోజుల పాటు కొనసాగే ఈ ప్రచార కార్యక్రమంలో తాను కూడా ప్రత్యక్షంగా పాల్గొంటానని చెప్పారు. సాధ్యమైనంత వరకు సైకిళ్లు, ఈ-సైకిళ్లపై ప్రజల మధ్యకు వెళ్లాలని పార్టీ నేతలకు సూచించారు.