ఏపీలో డీఎస్సీ-2026 ద్వారా 2,721 ఉపాధ్యాయ పోస్టుల భర్తీకి నోటిఫికేషన్ విడుదలైంది. నవంబర్ 11 నుంచి ఆన్లైన్ దరఖాస్తుల స్వీకరణ ప్రారంభం.
ఆంధ్రప్రదేశ్‌లో ఉపాధ్యాయ పోస్టుల భర్తీకి పాఠశాల విద్యాశాఖ డీఎస్సీ-2026 (ఏపీటీఆర్‌టీ-2026) ప్రకటనను విడుదల చేసింది. రాష్ట్రవ్యాప్తంగా వివిధ కేటగిరీల్లో మొత్తం 2,721 పోస్టులను భర్తీ చేయనున్నారు. అర్హులైన అభ్యర్థులు నవంబర్ 11 నుంచి ఆన్‌లైన్‌లో దరఖాస్తు చేసుకోవచ్చు.
మొత్తం ఖాళీల్లో 2,111 రెగ్యులర్ ఉపాధ్యాయ పోస్టులు ఉన్నాయి. వీటిలో స్కూల్ అసిస్టెంట్ (ఎస్‌ఏ), సెకండరీ గ్రేడ్ టీచర్ (ఎస్‌జీటీ) పోస్టులు ప్రధానంగా ఉన్నాయి.
ప్రత్యేక అవసరాలు కలిగిన విద్యార్థులకు బోధించేందుకు స్పెషల్ ఎడ్యుకేషన్ విభాగంలో 350 పోస్టులను కేటాయించారు. వివిధ ప్రభుత్వ సంక్షేమ సొసైటీల పరిధిలోని పాఠశాలల్లో మరో 260 పోస్టులను భర్తీ చేయనున్నారు. వీటిలో ప్రిన్సిపాల్, పీజీటీ, టీజీటీ, ఫిజికల్ డైరెక్టర్, పీఈటీ పోస్టులు ఉన్నాయి.
జిల్లాలవారీగా ఖాళీల సంఖ్య, సబ్జెక్టుల వివరాలు, విద్యార్హతలు, దరఖాస్తు రుసుము, ఎంపిక విధానం తదితర వివరాలను పాఠశాల విద్యాశాఖ అధికారిక వెబ్‌సైట్‌లో అందుబాటులో ఉంచారు. అభ్యర్థులు నోటిఫికేషన్‌ను పూర్తిగా పరిశీలించిన అనంతరం అర్హతలకు అనుగుణంగా దరఖాస్తు చేసుకోవాలని అధికారులు సూచించారు.
