వైసీపీ అసభ్య రాజకీయాలకు కేరాఫ్ అడ్రస్గా మారిందని మంత్రి కందుల దుర్గేష్ విమర్శించారు. సాయికృష్ణ కేసులో ప్రభుత్వం పారదర్శకంగా వ్యవహరిస్తోందని, కూటమి ఐక్యతను చూసి వైసీపీ రాజకీయ కుట్రలకు పాల్పడుతోందని ఆరోపించారు.
అమరావతి: రాజకీయ నాయకుల ప్రవర్తనా నియమావళి, నైతిక విలువల గురించి వైసీపీ నేతల నుంచి నేర్చుకోవాల్సిన దుస్థితిలో రాష్ట్ర రాజకీయాలు లేవని రాష్ట్ర పర్యాటక, సాంస్కృతిక, సినిమాటోగ్రఫీ శాఖ మంత్రి కందుల దుర్గేష్ అన్నారు. వెలగపూడి సచివాలయంలో మంగళవారం నిర్వహించిన మీడియా సమావేశంలో ఆయన వైసీపీ నేతల వైఖరిపై తీవ్రస్థాయిలో విమర్శలు గుప్పించారు.
గత ఐదేళ్లలో వైసీపీ నాయకులు ప్రదర్శించిన అసభ్య రాజకీయ సంస్కృతిని రాష్ట్ర ప్రజలు చూశారని మంత్రి పేర్కొన్నారు. మాజీ ముఖ్యమంత్రి వైఎస్ జగన్మోహన్ రెడ్డి నుంచి పలువురు వైసీపీ నేతల వరకు వ్యక్తిగత విమర్శలు, అనుచిత వ్యాఖ్యలతో రాజకీయాలను దిగజార్చారని ఆరోపించారు. సీఎం చంద్రబాబు నాయుడు, ఉప ముఖ్యమంత్రి పవన్ కళ్యాణ్ కుటుంబ సభ్యులపై చేసిన వ్యాఖ్యలను ప్రజలు మరచిపోలేదన్నారు.
సాయికృష్ణ అదృశ్యం కేసులో ప్రభుత్వం పూర్తి పారదర్శకతతో వ్యవహరిస్తోందని దుర్గేష్ స్పష్టం చేశారు. కేసులో నిందితుడిగా ఉన్న సీఐ నాగరాజును వెంటనే సస్పెండ్ చేయడమే కాకుండా ప్రత్యేక దర్యాప్తు బృందం (సిట్)ను ఏర్పాటు చేసి విచారణ వేగవంతం చేశామని తెలిపారు. సిట్ అధికారులు ఇప్పటికే నాగరాజును అదుపులోకి తీసుకుని దర్యాప్తు కొనసాగిస్తున్నారని చెప్పారు.
ఈ కేసును అడ్డం పెట్టుకుని కొన్ని ప్రాంతాల్లో కులాల పేరుతో సమావేశాలు నిర్వహించడం ద్వారా వైసీపీ రాజకీయ లబ్ధి పొందాలని చూస్తోందని మంత్రి ఆరోపించారు. ఎక్కడ ఏ సంఘటన జరిగినా దానికి కులం రంగు పూసి సమాజంలో విభజనలు సృష్టించడమే ఆ పార్టీ లక్ష్యంగా పెట్టుకుందని విమర్శించారు.
ఉప ముఖ్యమంత్రి పవన్ కళ్యాణ్ను ఒకే కులానికి పరిమితం చేసే ప్రయత్నాలు చేస్తున్నారని, ఆయన అన్ని వర్గాల అభివృద్ధికి కట్టుబడి ఉన్న నాయకుడని పేర్కొన్నారు. పవన్ కళ్యాణ్ వ్యక్తిత్వాన్ని దెబ్బతీయాలన్న ఉద్దేశంతో చేస్తున్న ప్రచారం ప్రజల్లో నిలవదన్నారు.
టీడీపీ, జనసేన, బీజేపీ కూటమి మరింత బలపడుతుండటంతో భవిష్యత్తులో అధికారంలోకి వచ్చే అవకాశాలు దూరమవుతాయనే ఆందోళన వైసీపీ నేతల్లో కనిపిస్తోందని దుర్గేష్ ఎద్దేవా చేశారు. అందుకే రాజకీయంగా ఉన్మాదపూరిత వ్యాఖ్యలు చేస్తూ ప్రజల దృష్టిని మళ్లించే ప్రయత్నం చేస్తున్నారని అన్నారు.
కాపు సామాజికవర్గంపై వైసీపీ చూపుతున్న ప్రేమ కేవలం రాజకీయ ప్రయోజనాల కోసమేనని మంత్రి ఆరోపించారు. 2019 నుంచి 2024 వరకు కాపు కార్పొరేషన్కు ఎంత నిధులు కేటాయించారో, ఎంతమంది యువతకు విదేశీ విద్య సహాయం అందించారో, కాపు భవనాల కోసం ఎంత ఖర్చు చేశారో గణాంకాలతో వెల్లడించాలని సవాల్ విసిరారు.
2014-19 మధ్య అమలులో ఉన్న పలు కాపు సంక్షేమ పథకాలను అధికారంలోకి వచ్చిన తర్వాత వైసీపీ ప్రభుత్వం నిలిపివేసిందని విమర్శించారు. వ్యక్తిగత దూషణలు, కుల రాజకీయాలు మానుకుని ప్రజా సమస్యలపై నిర్మాణాత్మక రాజకీయాలు చేయాలని వైసీపీ నేతలకు హితవు పలికారు. ప్రజలే అంతిమ న్యాయనిర్ణేతలని, వారి తీర్పు ఎప్పటికైనా ఎదుర్కోవాల్సి ఉంటుందని మంత్రి దుర్గేష్ పేర్కొన్నారు.
