ప్రభుత్వ ఉద్యోగులకు నైపుణ్యాభివృద్ధి శిక్షణను నిరంతర ప్రక్రియగా కొనసాగించాలని సీఎం చంద్రబాబు ఆదేశించారు. పట్టణాల్లో తాగునీటి సమస్యపై అప్రమత్తంగా ఉండాలని సూచించారు.
అమరావతి: పరిపాలనా దక్షతను మరింత పదును పెట్టేందుకు వీలుగా ప్రభుత్వ ఉద్యోగులకు నైపుణ్యాభివృద్ధి (కెపాసిటీ బిల్డింగ్) శిక్షణను నిరంతర ప్రక్రియగా కొనసాగించాలని ఆంధ్రప్రదేశ్ ముఖ్యమంత్రి నారా చంద్రబాబు నాయుడు స్పష్టం చేశారు. ఐఏఎస్ అధికారుల మాదిరిగానే కింది స్థాయి ఉద్యోగులూ ఎప్పటికప్పుడు సరికొత్త సాంకేతిక పరిజ్ఞానం, పాలనా విధానాల్లో ప్రావీణ్యం సంపాదించాలని సూచించారు. క్యాంప్ కార్యాలయంలో బుధవారం వివిధ ప్రభుత్వ శాఖల పనితీరు, ప్రజా సేవలపై రియల్ టైమ్ గవర్నెన్స్ సొసైటీ (ఆర్టీజీఎస్) ద్వారా ఉన్నతాధికారులతో ఆయన సమగ్ర సమీక్ష నిర్వహించారు. ఉద్యోగుల శిక్షణతో పాటు అన్న క్యాంటీన్ల నిర్వహణ, పట్టణ ప్రాంతాల్లో తాగునీటి సరఫరా, సంక్షేమ వసతి గృహాల్లో సౌకర్యాలపై విస్తృతంగా చర్చించారు.
దక్షిణాదిలోనే ఆంధ్రప్రదేశ్ అగ్రస్థానం
ప్రభుత్వ ఉద్యోగులకు సామర్థ్య పెంపుదల, నైపుణ్య శిక్షణ అందించడంలో దక్షిణాది రాష్ట్రాల్లోనే ఆంధ్రప్రదేశ్ అగ్రగామిగా నిలిచిందని ముఖ్యమంత్రి వెల్లడించారు. ‘ఐగాట్ కర్మయోగి’ డిజిటల్ వేదిక ద్వారా విస్తృత స్థాయిలో కోర్సులను అందుబాటులోకి తెచ్చి, క్షేత్రస్థాయిలో సమస్యలను త్వరితగతిన పరిష్కరించే రీతిలో ఉద్యోగులను సన్నద్ధం చేస్తున్నట్లు పేర్కొన్నారు. మారిన కాలానికి అనుగుణంగా ఉద్యోగులు వర్చువల్ విధానంలో తమ నైపుణ్యాలను ఎప్పటికప్పుడు మెరుగుపరుచుకోవాలని సూచించారు. పాలనా సామర్థ్యాన్ని మరింత ఉన్నత ప్రమాణాలకు తీసుకెళ్లేందుకు ప్రతిష్టాత్మక ఐఐటీలు, ఐఐఎంలతో సంయుక్తంగా ప్రత్యేక శిక్షణా కార్యక్రమాలను రూపొందించి అమలు చేయాలని అధికారులను ఆదేశించారు.
తాగునీటి సరఫరాపై అప్రమత్తత తప్పనిసరి
రాష్ట్రంలో తాగునీటి సమస్య తలెత్తకుండా పటిష్ఠమైన కార్యాచరణ చేపట్టాలని, ఈ విషయంలో ఎలాంటి అలసత్వాన్ని సహించేది లేదని చంద్రబాబు తేల్చిచెప్పారు. పట్టణ ప్రాంతాల్లో ప్రస్తుత నీటి సరఫరా పరిస్థితిపై అధికారులను ఆరా తీశారు. ఇటీవల కురిసిన విస్తారమైన వర్షాల వల్ల భూగర్భ జలాలు పెరిగి, పలు నగరాల్లో నీటి ఎద్దడి గణనీయంగా తగ్గిందని అధికారులు వివరించారు. విశాఖ నగరంలో భూగర్భ జలాలు రీఛార్జ్ కావడం వల్ల సరఫరా మెరుగైందని, రాయలసీమలోని రెండు పురపాలక సంఘాల్లో స్వల్పంగా ఉన్న కొరతను అధిగమించేందుకు తగిన చర్యలు తీసుకుంటున్నామని పేర్కొన్నారు.
దీనిపై స్పందించిన సీఎం.. వర్షాలు సమృద్ధిగా కురిశాయన్న ధీమాతో ఉదాసీనత చూపొద్దని హెచ్చరించారు. పట్టణాలు, పల్లెలు అనే తేడా లేకుండా ఏ ఒక్క ప్రాంతంలోనూ ప్రజలు తాగునీటి కోసం ఇబ్బంది పడకుండా శాశ్వత ప్రణాళికలు రూపొందించాలని స్పష్టం చేశారు. అలాగే ప్రభుత్వం చేపట్టే ప్రతి సంక్షేమ, అభివృద్ధి కార్యక్రమంలోనూ ప్రజల భాగస్వామ్యాన్ని విధిగా పెంచాలని పిలుపునిచ్చారు.
ఈ ఉన్నత స్థాయి సమీక్షా సమావేశంలో ప్రభుత్వ ప్రధాన కార్యదర్శి (సీఎస్) సాయి ప్రసాద్తో పాటు వివిధ శాఖల ఉన్నతాధికారులు పాల్గొన్నారు.
