టీడీపీ గ్రాండ్ రికార్డ్... 40 రోజుల్లోనే కోటికి పైగా ఇళ్లకు చేరిన ‘ఇంటింటికి తెలుగుదేశం-2026’

అమరావతి: కూటమి ప్రభుత్వం ఏర్పడి రెండేళ్లు పూర్తయిన సందర్భంగా ప్రభుత్వం అమలు చేసిన అభివృద్ధి, సంక్షేమ కార్యక్రమాలను ప్రతి ఇంటికీ చేరవేసేందుకు తెలుగుదేశం పార్టీ నిర్వహిస్తున్న ‘ఇంటింటికి తెలుగుదేశం - 2 ఏళ్ల నమ్మకం - అభివృద్ధి, సంక్షేమం’ కార్యక్రమం విజయవంతంగా కొనసాగుతోందని టీడీపీ రాష్ట్ర అధ్యక్షుడు పల్లా శ్రీనివాసరావు తెలిపారు.

పార్టీ నాయకులు, కార్యకర్తల పట్టుదల, సమన్వయంతో కేవలం 40 రోజుల్లోనే కోటి ఇళ్లను సందర్శించడం ద్వారా ‘ఇంటింటికి తెలుగుదేశం-2026’ కార్యక్రమం కీలక మైలురాయిని అధిగమించిందని ఆయన పేర్కొన్నారు.

కోటి ఇళ్ల సందర్శన సందర్భంగా టీడీపీ శ్రేణులు కూటమి ప్రభుత్వం రెండేళ్ల పాలనలో చేపట్టిన అభివృద్ధి, సంక్షేమ కార్యక్రమాలను ప్రజలకు వివరించడంతో పాటు సూపర్ సిక్స్ హామీల అమలు తీరును కూడా తెలియజేశాయని పల్లా శ్రీనివాసరావు తెలిపారు.

ప్రజలతో మమేకమే లక్ష్యం

పార్టీ కేడర్‌ను ప్రజలకు మరింత చేరువ చేయాలన్న సంకల్పానికి కోటి ఇళ్ల సందర్శన మైలురాయిగా నిలిచిందని పల్లా శ్రీనివాసరావు అన్నారు.

ప్రతి రోజూ లక్షలాది కుటుంబాలను నేరుగా కలుసుకుంటూ ప్రజలతో మమేకమై, ప్రభుత్వ కార్యక్రమాలు, సంక్షేమ పథకాలు, అభివృద్ధి కార్యక్రమాలను వివరించడంతో పాటు వారి అభిప్రాయాలను కూడా పార్టీ శ్రేణులు సేకరించాయని తెలిపారు.

ప్రజలు ఎదుర్కొంటున్న సమస్యలను తెలుసుకుని వాటి పరిష్కారానికి కృషి చేయడం ద్వారా పార్టీ కార్యకర్తలు ప్రజలకు మరింత చేరువయ్యారని ఆయన పేర్కొన్నారు.

కోటి ఇళ్ల సందర్శనకు కార్యకర్తలే కారణం

‘ఇంటింటికి తెలుగుదేశం-2026’ కార్యక్రమం కోటి ఇళ్ల మైలురాయిని చేరుకోవడంలో పార్టీ నాయకులు, కార్యకర్తల కృషి కీలకమని పల్లా శ్రీనివాసరావు అన్నారు.

“ఈ మైలురాయి చేరుకోవడం పార్టీ నాయకులు, కార్యకర్తలదే క్రెడిట్” అని ఆయన పేర్కొన్నారు.

కార్యక్రమాన్ని విజయవంతంగా ముందుండి నడిపిస్తున్న ప్రతి కార్యకర్తకు అభినందనలు తెలిపారు. ప్రజల నుంచి లభిస్తున్న విశేష స్పందనే కార్యక్రమం విజయానికి నిదర్శనమని అన్నారు.

చంద్రబాబు దిశానిర్దేశం.. లోకేష్ పర్యవేక్షణ

టీడీపీ జాతీయ అధ్యక్షుడు, ముఖ్యమంత్రి నారా చంద్రబాబు నాయుడు దిశానిర్దేశంతో, పార్టీ వర్కింగ్ ప్రెసిడెంట్ నారా లోకేష్ పర్యవేక్షణలో ‘ఇంటింటికి తెలుగుదేశం-2026’ కార్యక్రమం విజయవంతంగా కొనసాగుతోందని పల్లా శ్రీనివాసరావు తెలిపారు.