వెలిగొండతో మార్కాపురం రూపురేఖలు మారతాయి: మంత్రి గొట్టిపాటి రవికుమార్

అమరావతి: వెలిగొండ ప్రాజెక్టు పూర్తవడంతో మార్కాపురం ప్రాంత రూపురేఖలు సమూలంగా మారనున్నాయని ఇంధన శాఖ మంత్రి గొట్టిపాటి రవికుమార్ అన్నారు. సాగునీరు, తాగునీటి భద్రతతో పాటు వ్యవసాయం, ఉద్యానవనం, ఉపాధి రంగాల్లో కొత్త అవకాశాలు ఏర్పడి ఈ ప్రాంతం సమగ్ర అభివృద్ధి దిశగా ముందుకు సాగుతుందని తెలిపారు.

ఆంధ్రప్రదేశ్‌ అభివృద్ధిలో చరిత్ర సృష్టించాలన్నా.. గత చరిత్రను తిరగరాయాలన్నా ముఖ్యమంత్రి చంద్రబాబు నాయుడికే సాధ్యమని మంత్రి పేర్కొన్నారు. వెనుకబడిన మార్కాపురం ప్రాంతాన్ని జిల్లాగా ఏర్పాటు చేయడం, హార్టికల్చర్‌ హబ్‌లో చేర్చడం, మూడు దశాబ్దాలుగా పెండింగ్‌లో ఉన్న వెలిగొండ ప్రాజెక్టును పూర్తి చేసి ప్రారంభించే స్థాయికి తీసుకురావడం చంద్రబాబు నాయకత్వంలోనే సాధ్యమైందన్నారు.

మూడు దశాబ్దాల నిరీక్షణకు తెర

మార్కాపురం ప్రాంత ప్రజలు మూడు దశాబ్దాలుగా ఎదురుచూస్తున్న వెలిగొండ ప్రాజెక్టు కల సాకారం కానుందని గొట్టిపాటి రవికుమార్ తెలిపారు.

ఆదివారం ముఖ్యమంత్రి చంద్రబాబు నాయుడు చేతుల మీదుగా వెలిగొండ ప్రాజెక్టు ప్రారంభోత్సవం జరగనుందని చెప్పారు. ఈ ప్రాంత ప్రజలకు ఇది అత్యంత చారిత్రక ఘట్టమని పేర్కొన్నారు.

వర్షాభావ పరిస్థితులు, సాగునీటి కొరతతో ఇబ్బందులు పడుతున్న మార్కాపురం ప్రాంతానికి వెలిగొండ ప్రాజెక్టు శాశ్వత పరిష్కారానికి మార్గం చూపుతుందని మంత్రి అన్నారు.

నికర జలాల కోసం ఢిల్లీకి వెళ్లి పోరాటం

వెలిగొండ ప్రాజెక్టుకు నికర జలాలు సాధించేందుకు తాము ప్రతిపక్షంలో ఉన్న సమయంలోనే ప్రకాశం జిల్లా ఎమ్మెల్యేలు, ప్రజాప్రతినిధులు, నాయకులతో కలిసి ఢిల్లీ వెళ్లి కేంద్రంపై ఒత్తిడి తీసుకువచ్చామని మంత్రి తెలిపారు.

ప్రాంతీయ ప్రజల ప్రయోజనాల కోసం అప్పట్లో చేసిన పోరాటం ఫలించిందన్నారు.

అయితే గత వైసీపీ ప్రభుత్వ హయాంలో సాగునీటి ప్రాజెక్టుల నిర్వహణను నిర్లక్ష్యం చేశారని ఆయన ఆరోపించారు. జగన్‌ ప్రభుత్వ కాలంలో అన్నమయ్య ప్రాజెక్టు కొట్టుకుపోయిందని, పులిచింతల, ప్రకాశం బ్యారేజీ, గుండ్లకమ్మ ప్రాజెక్టుల గేట్లు దెబ్బతిన్నాయని విమర్శించారు.

ప్రాజెక్టుల నిర్వహణపై నిర్లక్ష్యం వహించిన వైసీపీ నేతలకు వెలిగొండ ప్రాజెక్టు గురించి మాట్లాడే అర్హత లేదని మంత్రి అన్నారు.

కరువు ప్రాంతాల్లోకి నీరు.. అభివృద్ధికి కొత్త బాట